عمّان مش بس شوارع… عمّان مشاوير.

اركب تكسي أبو علي الأصفر، شغل لوحة التاكسي، شغّل العدّاد، ولف المدينة اللي بتعرفها شارع شارع: من صويلح والجامعة، نزولاً عالدوار الأول لحد الثامن، العبدلي والشميساني والصويفية وعبدون، وسط البلد وشارع الرينبو، طريق المطار… ولحد البحر الميت، 412 متر تحت سطح البحر.

عمّان درايف لعبة سيارات أردنية ومحاكي قيادة بعالم مفتوح، مبنية على خريطة عمّان الحقيقية بتلالها وطلعاتها ونزلاتها، وأسماء الشوارع الحقيقية عاليافطات. أول ما تطلع بالتكسي رح تعرف وين إنت بدون ما حدا يحكيلك.

يوم بحياة سوّاق تكسي
• خمس أنواع ركّاب: الموظف المستعجل، الحجّة اللي بدها سواقة هادية، السائح اللي بدّه يشوف المعالم، الطالب اللي بيحب النطّات، ورجل الأعمال اللي ما بيقبل تقطع إشارة.
• كل راكب إله رأي بسواقتك وبيحكيه بصوت عالي: «شوي شوي!»، «يا زلمة انتبه!»، «شو إحنا طايرين؟!»
• «عالعدّاد ولا مقطوعة؟»، ومشاوير عالمطار، ونجوم على قدّ ما سقت منيح.

لكل مركبة شغلتها
أكثر من عشر شغلات من حياة عمّان: خط الكوستر والكونترول بنادي عالركّاب، السرفيس، سيارة الغاز بلحنها المعروف، سحب السيارات المعطّلة، القلّاب، توصيل الطلبات، نقل الشخصيات المهمة وفنجان القهوة لازم ما ينكب، الإسعاف الجوي بالهيلوكبتر، السباقات، التفحيط والخمسات، وامتحان السواقة.

12 مركبة
تكسي أبو علي، و11 مركبة تشتريها من تعبك: صالونات التسعينات، بكم دبل كابين، جيب، كوستر، قلّاب، موتورات، سيارة كهربائية رياضية، مسل كار أمريكية… وهيلوكبتر تشوف عمّان من فوق.

مدينة عايشة
• معالم مبنية حجر حجر: المدرج الروماني والساحة الهاشمية، جبل القلعة، مسجد الملك المؤسس بقبّته الزرقاء، أبراج العبدلي، جسر عبدون، صرح الشهيد، وسارية العلم برغدان.
• عربايات الكعك، قطط الشوارع، مواقف السرافيس، وزفّات وأعراس ليلة الخميس بالدبكة.
• أكثر من 500 مكان تكتشفه.

لكل يوم جوّه نهار وغروب وليل منوّر، شتا وغبرة خماسينية وضباب… ويوم الثلجة، بزلام ثلج لابسين شماغ وولاد بيرشقوك بالثلج.

للشارع أصول إشارات بعدّاد تنازلي، كاميرات سرعة بمواقعهاالحقيقية، ولو قطعت الإشارة الحمرا… الشرطة وراك.

وكمان
• خريطة كاملة لعمّان، بحث بالعربي والإنجليزي، وإرشادات خطوة بخطوة.
• مسيرة من 11 مرحلة: من أول يوم بالتكسي لحد ما تصير أشطر سوّاق بعمّان.
• وضع تصوير وتسجيل فيديو، وتحكّم باللمس أو بيد التحكّم.
• بدون حساب ولا تسجيل دخول.

ليش عمّان درايف؟ لأنها مش بس لعبة سيارات من ألعاب السيارات اللي بتعرفها… هاي عمّان نفسها، بدواويرها وزحمتها وطلعاتها وناسها، صارت محاكي سواقة بتلعبه من تلفونك.

اللعبة مجانية، والإعلانات اختيارية بس: إنت بتقرّر إذا بدك تتفرّج على إعلان مقابل مكافأة. وما في إشي ينباع جوّا اللعبة.

يلا… العدّاد شغّال، والدوار السابع مستنّيك.

بيانات الخرائط © المساهمون في OpenStreetMap وMicrosoft (ODbL).